انته اول عشك فك باب كلبي وفات

انته اول عشكَ..
فك باب كَلبي وفات..
ذب ثوب الحزن من لون ضحكاتي..
وانته اول درب..
حسيته يكَدر يختصر..
جهدي ومسافاتي ..
قريب بعيني اشوفك..تللزم بالايد..
ومن انوي عليك بمستاحي اعثر..
واحسك مدري ليش..
اتصير مني ابعيد..حيل ابعيد..
وانته اباب خطواتي ..
اشوفك ورد جوري ..
وعطر خدك ماي ..وتصير الروح فراشه
وتظل اترفرف بذاتي...
انكسر كل حاجز اكَبالي..
وتشظه الخوف..
من سيرن نضراتك نثايه الحظن نظراتي..
حسيتك وطن لحظتها وتعنيت..
اعيشن بيك..
وبني بطين حسنك..
كل حضاراتي..
يالشايل حسن بغداد سد الباب..
اخاف اعليك من هولاكو اذا شافك..
يجي يغزيك..
يهدم حبنا اذا يغزيك..
وينهب كل جمال البيك..
ويذبح كل قوانيني على عتبة مسلاتي..
كل صفنه سفينه بلليل تبحر بيك..
يتلكَاهه روج بعينه شايل خوف..
يدفع جان ضهر الروج ..
جف ريح اليضدوني..
وكَلت ما خاف..
مادام العشكَ ملاح ..
وانته اشراع صفناتي..
ولك ياما دلالك داس بعيوني..
وكَمت ماشوف..
كَلت عيوني تعبانات..
ما كَلت السبب منك..
وياما خلو السيف بركَبتي ..
وكَلت احبنك..
ومن كَد ما احبنك..صرت مجنون..
ابوس من امشي اضل بالناس ..
لأن بوجوه كل الناس اشوفنك..
ومن كَد ما احبنك..
رسمتك على شفافي شفاه..
حته شما احرك اشفاي ابوسنك..
احبنك يمن شلت اعله ضهرك..
ثكَل دمعاتي..

دخلت العالمك تعبان..
اريد ارتاح..

واخلص من معاناتي...
يااول عشكَ فك باب..
كَلبي وفات..
ذب ثوب الحزن من لون..
ضحكاتي

شعر روووعه عاشت يمناك

انتي الاروح ورده
نورتي

كولش حلووو
عاشت الايادي

» عايش هسه انته تكول
» اغار اعليك من كلبي والعيون
» ها يا كــــــلب ليش انته حبيت وانه ادري بمحبتك من طرف واحد
» كلمات اغنيه جي فاير وياسر عبدالوهاب بعنوان تكسر كلبي فد شي يخبل
» دويتو { جي فاير + ياسر عبد الوهاب } دويتو بعنوان { تكسر كلبي }