تعال وخل اذكرك ماضي الك وياي
غفت چم مره روحي ابين ذرعانك ..؟
وتعال وخل أَذَكرك .. يمكن انت انسيت ..
شم عطر الوفه تلكاه بقمصانك
وتعال وخل أَشَوفك بالگلب نيشان ..
من توصل لگلبي اتشوف نيشانك
أمس چان الفراش يحط عالورود
أويطير بسرعه ويغير المشاوير
ولأن عالورد رسمك هسه موجود
الفراش امن الورد ما يقبل يطير
واذا تودعني صدگ تكسر الروح
وكسر الروح ابد ميفيده تجبير
بچيت الصخر من ونتي اعليك
لأن گلبي زغير وفگدك چبير
خسرتك والدموع اتعاتب الليل
لأن منك بقت بس التصاوير
أنه بعدك شسولف راگد الحيل
وعلى حالي بچت حتى العصافير
زغير اتخيل امه اتعوفه وتموت
ألوحشه التصيبه اشلونهه اتيصر
هيچ اني أحسن لمن اتغيب
مثل وحشت الأم التترك ازغير
ظنيتك أهل وطلعت خطار
وصرت لجلك مضيف ودله وحصير
وتمنيتك تظل بمضيفي لحظات
لأن وحشه المضيف ابلا خطا طير
مثلك وين ألگه اوخاطر انساك
وشينسي الزرع فضل النو
لأ أرجوك بطل كلمة اوداع
أنه شجرة اوداعك چن مناشير
تجرحني وأبد ما گولن الأخ
لأن الأخ احسهه وياك تقصير
شلت لجلك خلگ يا نور العيون
مثل خلگ الخشب ويه البسامير
يمي انته ودموعي ايترسن الطوس
واذا تمشي أظن ايترسن البير
غارات الهموم اتعب الگلوب
واذا ترحل عليه اهمومك اتغير
مو بيدك اعرفك والله مجبور
تودعني وتروح ودمعك يحير
بس رايد أگلك گبل الوداع
العمر يا غالي بعدك يصبح اگصير
وخذ وياك ذني اعيوني الاتنين
حتى اني أگول اويا نواطير
يحرسنك لحد ما يوصل الليل
وگبل نومك يگولن تصبح بخير
وبس اثنين منك أطلب ارجوك
تنفذهن أليه بصدق تعبير
تذكرني أذا باوعت النجوم
وعلي تبچي اذا مرن عصافير
تحيتي واحترامي للجميع
موضوع: زغير اتخيل امه اتعوفه وتموت 
الخميس يوليو 21 2011, 23:13
