فاركتك نعم . بس ماأخِـسرك لا

فاركتك نعم . بس ماأخِـسرك لا



وحگ إدموع عينك أنته تخسرني..




وحگ حمرة الشفة وخدك الريـّـان

ماتگدر بعد لأحضانك تجرني..




صرت ماضي ونسيتك وأنتهى الموضوع

ماأهتم بعد تنساني . تذكرني..




أشوف الوفه بعينك گلي وك شيفيد

إذا بعيون گلبك أنته تغدرني..




إلك كرست وقتي وردت ألمك ليش ..

كرست انته وقتك حتى تنثرني ..




چنت جملة وأصوغك گبل لا أحچيك

بس هسه سكتتك چذب تحضرني..




وذا صرت إنته وردة وكلهم يشموك

مو آني السگيتك هسه تنكرني..




وأنا البدروب جسمك لسة اثر ممشاي

ليلاً چنت أفوت وما تعثرني..




ولهسه أندل بعد بيك آني كومة دروب

وانته الچنت بيدك بيهه تشمرني..




ولهسه آثار نابك والمخالب هاي

من إعطشت روحك ردت تعصرني..




ولك مو گتلك آني اللي سگيتك جوز

دتركني إبتعد وأنساني وأحذرني..




أبچيك وألوعك وأسطرك وانهيك

إذا مرة بلسانك بعد تذكرني..




بعد لاتذكر اسمي ووجهي هم أنساه

وأذا مرة خطرت أبالك اعبرني..




كشفتك مو ملاك أنته إطلعت شيطان

ماأقبل بعد شيطان يأمرني..




لأنّ إشما أنصحك مستحيل أتوب

أذا قرآن أصير وياك تكفرني!!.