اهـــــــــــداء الى كل أم ...

يمه البيت عكبج يبجي عالبيت
وسود وداعتـــــج شفـت الحياطيــــــن

وعتبة بيتنه زعلت على البـــــــــــاب
وعلينه أتسودنت ما ترضى ترحيــــــــن

وشفت دمع البلابل والعصافيـــــر
طاح إعله المكان البــــي تكعــدين

وشفت لطخت حزن بخدود الـــــورود
وصبح بستانه يبجي البـــــــساتين

فراكج موسهل يذبحني كل يوم
كل يوم بسـنه لا والله عشـــــــرين

ييمه بفركتج نص عمري ماخوذ
ولا جن فركتـــــج يايمه يـــــومين

ما أدري شيضل لو طال الفــــــراك
على هذا الوضــــع ينراد عمــــرين

شكض من الدمع ودموعي شلال
وعليج اتسودنت ماتسكت العــين

جلمة يمــــه منــــج بلسم جــروح
وجلمة بعد بيتي أتداوي جرحـــين

أذا موجوده يمه نصير عـــــــقال
ونصـــير بغيبتـــج مثل المجانـين

على وجهج لكينه الحزن مـرسوم
وكبـــاله الفرح ذابحـــــته السـنين

تروح بروحتج ماتبـــقى ارواح
جسد واكف جــذب بس احنه ميتين

يااجمل وحن مخلوق بالكــــون
مثلج ما كو مثلـــــج أقسم ثنــين

تحت جدمج جنان وتجري انهار
وبعـــد فوك الجـدم اشكال تلــكـين

يا ام الوفه ماشــــوف أوفيـــــــج
لو كد نــوح عمري يصــير مرتين

اغفه بحضن صبرج وانه شبــعان
واحس جوعانه كلـــش من تنـــامين

امي الجــــنه انتـــــي منزله بيت
وتنام بظـــلج ابيــوت الجــــــوارين

سكوتج ادري يمه يحير الليل
مثل صفنة البـــحر لمـــن تصفنيـن

واذا تحجين بلبل يعـــــزف الحان
ومن حلكج يظل يطـــافر الــتــــيـن

خيط السبحه انتي اخذينه ويـــــــاج
نطشر خـــــرز لمــــــن تروحــــين

نطشر خرز لمن تروحين